Txhua tus neeg nyob hauv xeev Minnesota hnub nyoog 6 hli rov saud mas tam sim no muaj feem mus txhaj tshuaj tiv thaiv tus kab mob COVID-19 lawm. CDC xav kom txhua tus neeg uas tuaj yeem txhaj tshuaj tiv thaiv kab mob yuav tsum txhaj rau thawj zaug uas muaj rau lawv.

Kev txhaj tshuaj tiv thaiv yog txhaj pub dawb. Koj tsis tas yuav muab daim ID los ntawm tsoom fwv los sis ntawv tuav pov hwm kho mob kom txhaj tshuaj tiv thaiv, thiab yuav tsis nug txog ntaub ntawv nyob hauv teb chaws hlo li.

Yog tias koj muaj lus nug txog cov tshuaj tiv thaiv COVID-19, los sis lwm yam tshuaj tiv thaiv uas koj tus me nyuam xav tau, nrog koj tus me nyuam tus kws kho mob tham.

Yog xav paub ntxiv thiab xav paub txog cov chaw txhaj tshuaj uas yuav muaj rau tom ntej no, mus saib hauv spps.org/covidvaccine.

Kev siv ntaub npog qhov ncauj qhov ntswg hauv SPPS tej vaj tse thiab hauv tsev kawm ntawv cov tsheb npav thaum kev kis tus kab mob COVID-19 nyob rau theem qis mus rau theem nrab hauv Ramsey County yog siv raws li yus yeem. Yuav tsum tau siv ntaub npog qhov ncauj qhov ntswg thaum cov theem kev sib kis kab mob COVID-19 nyob rau theem siab hauv Ramsey County. Qhov nov yog hais txog tag nrho cov neeg ua hauj lwm, cov tub ntxhais kawm ntawv thiab cov qhua (hnub nyoog 2 xyoos rov saud) huv tib si, tsis hais cov uas twb txhaj tshuaj tiv thaiv tag lawm los tsis tau txhaj, tshwj qhov tias ntshe tus neeg ntawd ho muaj kev zam nkaus xwb.

CDC muaj xov qhia tshiab txog kev kis tus kab mob COVID-19 hauv zej zos txhua hnub Thursday. Yog thaum twg cov theem kev sib kis tus kab mob COVID-19 hauv zej zos nyob rau theem siab ces SPPS mam li hais mus qhia rau cov tsev neeg thiab cov neeg ua hauj lwm thiab yuav tsum tau looj ntaub npog qhov ncauj qhov ntswg.

SPPS pom zoo kom cov neeg xws li nram qab no yuav tsum looj ntaub npog qhov ncauj qhov ntswg tsis hais cov theem kev kis kab mob hauv zej zos nyob rau theem twg:

• Cov neeg uas tsis tau txhaj tshuaj tiv thaiv los sis tsis tsim nyog txhaj tshuaj tiv thaiv
• Cov neeg uas lub cev tsis muaj zog tiv thaiv kab mob los yog muaj kev pheej hmoo siab rau qhov yuav mob hnyav los ntawm tus kab mob COVID-19
• Cov neeg uas ua hauj lwm nrog cov neeg uas lub cev tsis muaj zog tiv thaiv tau kab mob thiab cov uas tsis tsim nyog txhaj shuaj tiv thaiv
• Cov neeg ua hauj lwm thiab cov tub ntxhais kawm ntawv uas tom qab kuaj pom tias muaj tus kab mob COVID-19 thiab twb cais tus kheej mus nyob rau ib qho tsib hnub lawm mas yuav tsum tau looj ntaub npog qhov ncauj qhov ntswg mus li tsib hnub ntxiv thaum uas rov qab mus kawm ntawv kom txo tau txoj kev sib kis kab mob. 
• Cov uas muaj ib tug neeg hauv tsev neeg uas nyuam qhuav kuaj pom tias muaj tus kab mob COVID-19
• Cov tub ntxhais kawm ntawv muaj mob uas tab tom raug soj ntsuam los ntawm chav soj ntsuam mob los sis tab tom tos tsev neeg tuaj tos mus tsev kom txo tau txoj kev sib kis

SPPS yuav saib xyuas kom muaj kawm ntawv tim ntsej tim muag txuas ntxiv. Txawm tias SPPS tsis muaj chaw txaus rau sawv daws nyob kom sib nrug deb, los peb yuav ua tib zoo saib xyuas thiab siv lwm seem los tiv thaiv kom pab txo tau txoj kev sib kis tus kab mob COVID-19 thiab lwm yam kab mob uas sib kis tau.

Cov tsev neeg yuav tsum soj ntsuam lawv cov me nyuam txhua tag kis ua ntej yuav xa lawv mus kawm ntawv los sis mus rau tom qhov chaw tos npav. Thaum tuaj txog tom tsev kawm ntawv, cov neeg ua hauj lwm mam li soj ntsuam rau lub caij kawm ntawv.

Teb cov nqe lus nug nram no txhua tag kis ua ntej xa nej tus me nyuam mus kawm ntawv:

1. Tsis ntev los no kuv tus me nyuam puas nyuam qhuav mus kuaj tau tias nws muaj tus kab mob COVID-19?
2. Puas muaj tej yam tshwm rau kuv tus me nyuam raws li sau rau saum toj no uas ntxim yog tus kab mob COVID-19, txawm tias nws twb txhaj cov koob tshuaj tiv thaiv, koob uas txhaj ntxiv, los sis twb mob COVID-19 tas lawm?

Yog nej teb tias MUAJ raws li ib nqe saum toj no:

• Txawm nej tus me nyuam twb txhaj tshuaj tiv thaiv tag lawm los tsis txhob xa nws mus kawm ntawv. Hu mus qhia tias nej tus me nyuam tsis mus kawm ntawv, thiab hu mus rau nej tus me nyuam tus kws kho mob.
• Qhia tej yam ntxwv mob uas tshwm rau nej tus me nyuam los sis qhov uas nej tus me nyuam tau mus ze rau tej tus neeg uas muaj tus kab mob no rau hauv qhov chaw qhia online SPPS COVID-19 Reporting System kom paub tias kauj ruam tom ntej yuav ua li cas. SPPS COVID-19 Reporting System

SPPS cov kev npaj rau kev kuaj tus kab mob COVID-19 rau xyoo kawm ntawv 2022-23 yog yuav ua raws li cov kev qhia thiab khoom kuaj kab mob uas muaj los ntawm Minnesota Department of Health. Lub hom phiaj ntawm qhov khoos kas kuaj kab mob yog ua kom cov me nyuam hauv Minnesota thiab cov kws qhia ntawv muaj cov khoom siv los kuaj tus kab mob COVID-19 ntxiv. CDC muaj qhia ntxiv txog qhov tseem ceeb ntawm kev kuaj tus kab mob COVID-19 nyob rau ntawm What to Know About COVID-19 Testing in Schools. 

Xeev Minnesota yuav muab ib co khoom kuaj kab mob hauv tsev tuaj rau cov tsev kawm ntawv qib K-12. Cov khoom no yog muab tuaj kom cov tub ntxhais kawm ntawv thiab xib fwb tau coj mus siv kuaj mob tom tsev. Qhov yuav ua kom tau raws li cov kev thov tuaj mas nyob ntawm seb puas muaj txaus. MDH yuav lav tsis tau tias yuav ua tau xwb xwb.

Txhua zaus uas kuaj pom tau tias muaj tus kab mob COVID-19 mas yuav tsum muab qhia rau hauv SPPS COVID-19 Reporting System. Txawm kuaj tsis pom tias muaj tus kab mob COVID-19, los tsuav yog tus tub ntxhais kawm ntawv thiab neeg ua hauj lwm muaj cov tsos mob xwb ces nws yuav tsum tsis txhob mus kawm ntawv los sis ua hauj lwm kom txog rau thaum uas nws zoo thiab tsis ua npaws tau muaj 24 teev lawm. 

Qhov chaw Tsim cov khoom kuaj no muaj cov lus qhia txog kev kuaj kab mob ua lus Askiv English thiab lus Spanish thiab peb yuav tsim tsis tau cov lus qhia no ua lwm hom lus.  

• VIDEO QHIA TIAS YUAV UA LI CAS: Cov lus qhia txog cov khoom kuaj BinaxNOW™ COVID-19 Self Test: youtu.be/baQQfoX-JXo 
• BinaxNOW: Yam Koj Yuav Tsum Paub: abbott.com/corpnewsroom/diagnostics-testing/BinaxNOW-what-you-need-to-know.html

Yog xav kuaj li niaj zaus xwb ces mus kuaj ntawm nej tus kws kho mob, cov khw muag tshuaj hauv zej zos thiab cov chaw kuaj mob hauv zos. Hais kom luag xa cov khoom kuaj mob tuaj pub dawb rau nej ntawm tsev los sis nrhiav cov chaw kuaj COVID-19 hauv zej zos. Peb cov tsev kawm ntawv tsis muaj cov khoom kuaj mob txaus rau txhua txhua tus neeg ua hauj lwm thiab cov tsev neeg, yog li yuav tau nrhiav lwm seem kev pab thiab.

Cov xib fwb thiab tub ntxhais kawm ntawv uas kuaj tau tias muaj tus kab mob COVID-19 yuav tau cais tus kheej mus nyob rau ib qho li 5 hnub thiab tom qab tsis ua npaws tau 24 teev thiab tsis muaj cov tsos mob los sis tus mob zoo lawm mam li rov qab mus kawm ntawv thiab ua hauj lwm. Peb xav kom thaum rov qab tuaj kawm ntawv thiab ua hauj lwm lawv yuav tsum looj ntaub npog qhov ncauj qhov ntswg 5 hnub ntxiv.

Pib txij hnub tim 8/5/22 mus, cov tub ntxhais kawm ntawv thiab cov neeg ua hauj lwm uas tsis tau txhaj tshuaj tsis tas cais tus kheej mus nyob rau ib qho 5 hnub lawm yog tias ib tug neeg hauv tsev neeg mob COVID-19. Yog tias ib tug neeg hauv tsev neeg kuaj pom tias tau tus kab mob COVID-19 lawm, txhua tus tub ntxhais kawm ntawv thiab cov neeg ua hauj lwm ntawm tsev neeg ntawd yuav tau looj ntaub npog qhov ncauj qhov ntswg thaum mus kawm ntawv los yog ua hauj lwm mus txog thaum tus neeg ntawd tsis muaj cov tsos mob lawm. Yog tias tus tub ntxhais kawm ntawv los sis neeg ua hauj lwm pib muaj cov tsos mob thiab/los sis kuaj pom tias tau tus kab mob COVID-19 lawm, nws yuav tsum qhia mus rau SPPS COVID-19 Reporting System kom paub tias kauj ruam tom ntej yuav ua li cas thiab tsis txhob mus kawm ntawv los sis ua hauj lwm. 

Kev cais mus nyob rau ib qho vim muaj tus kab mob COVID-19 yog ib qho uas suav hais tias tsis mus kawm ntawv yam tau kev tso cai. Cov xib fwb mam li muab cov kev kawm thiab ntaub ntawv uas muaj ua tso rau hauv Seesaw/Schoology thiab lwm qhov rau cov tub ntxhais kawm ntawv uas nyob hauv tsev vim raug tus kab mob COVID-19. Xib fwb mam muab sij hawm ntxiv rau cov tub ntxhais kawm ntawv no ua lawv cov ntawv kom tiav los sis caum kom cuag raws li xav tau.

Txawm tias muaj neeg qhia tuaj tias raug tus kab mob COVID-19 los SPPS yuav tsis taug qab lawm. Nov txhais tau tias txawm muaj ib tug neeg hauv lawv tus me nyuam chav kawm ntawv, pab kis las, lub npav los sis lwm chav kev kawm qhia tuaj tias mus kuaj pom tias raug tus kab mob COVID-19 lawm los peb yuav tsis hais mus qhia rau cov tsev neeg paub lawm. 

SPPS yuav tsum tau qhia txog cov kev kis kab mob COVID-19 hauv tsev kawm ntawv mus rau Minnesota Department of Health. Kuj yuav muab cov kev kis kab mob teev qhia rau hauv SPPS COVID-19 Dashboard thiab.

Kev tawm mus kawm sab nraud uas yog mus kawm hauv lub lav no xwb mas yuav pub mus li ib hnub thiab ib hmos. Kev tawm mus kawm sab nraud uas yog mus txawv lav (ib hnub thiab ib hmos) mas yuav pub mus thaum cov theem kev kis kab mob COVID-19 hauv zej zos ntawm Ramsey County thiab qhov chaw uas yuav mus ntawd nyob rau theem qis los sis theem nrab. Tej zaum yuav tau looj ntaub npog qhov ncauj qhov ntswg thiab/los sis yuav tsis pub tawm mus kawm sab nraud yog tias cov theem kev kis kab mob COVID-19 hauv zej zos ntawm Ramsey County thiab qhov chaw uas yuav mus ntawd nce rau theem siab lawm.

Cov niam txiv/saib xyuas mus tau rau hauv cov tsev kawm ntawv. Cov qhua sab nraud yuav tsum tau looj ntaub npog qhov ncauj qhov ntswg thaum cov theem kev kis kab mob COVID-19 hauv Ramsey County nyob rau theem siab.

Tu tej vaj tse kom huv txhua hnub, txhim kho kom cov kev nqus cua thiab tso cua tawm hauv tsev kawm ntawv ua hauj lwm zoo ntxiv, thiab sau ntawv lo qhia thoob plaws hauv cov tsev kawm ntawv kom nco ntsoov tias yuav ua li cas thiaj li muaj kev nyab xeeb yog qee yam ntawm ntau cov kauj ruam uas peb ua los pab kom txo tau txoj kev sib kis kab mob COVID-19 thiab lwm yam kab mob uas sib kis tau rau hauv peb cov tsev kawm ntawv thiab cov khoos kas.

Kev siv cov tshuaj tua kab mob uas pom zoo EPA-approved disinfectant for SARS-CoV-2, cov neeg tu tsev yuav so thiab tsuag tshuaj rau cov chaw uas sawv daws siv thiab pheej chwv heev heev thoob plaws hauv tsev kawm ntawv rau txhua hnub uas kawm ntawv. Peb muaj tshuaj rau cov xib fwb siv los so thiab ntxuav tej qhov uas lawv pom tias yuav tau tu kom huv, raws li xav tau. 

Cov tswv yim los pab txhawb kev noj qab nyob zoo ib puag ncig muaj xws li:

• Ua raws li cov txheej txheem SPPS COVID-19 Disinfection and Cleaning Procedures thaum ntxuav thiab tu vaj tse kom huv si.
• Cov neeg tu tsev siv tshuaj ntxuav cov chaw uas nquag siv kom txhob muaj kab mob; cov neeg ua hauj lwm tu lawv cov chaw ua hauj lwm kom txhob muaj kab mob raws li lawv nyiam los tau
• Saib xyuas kom muaj tej khoom tsim nyog los siv txhawb txoj kev noj qab nyob zoo (xws li xab npum, tshuaj ntxuav tes, ntaub so tes, thiab tshuaj ntxuav los yog so ub no kom txhob muaj kab mob), thiab muab tej khoom siv tso rau tej chaw uas nquag siv.
• Siv cov tshuaj tua kab mob uas pom zoo EPA-approved disinfectant for SARS-CoV-2
• Tu thiab siv tshuaj tua kab mob ntxuav qhov chaw haus dej kom huv si

SPPS cov vaj tse muaj cov cuab yeej tso cua thiab nqus cov cua ntshiab sab nraum zoov los rau cov chav kawm, chav hauj lwm, chav ua si, chav noj mov thiab chav sib sau kom muaj tej cua tshiab huv si rau hauv tsev kawm ntawv. Chav hauj lwm saib xyuas cov vaj tse tau siv lwm seem xws li nram qab no los pab txo txoj kev sib kis kab mob ntawm tej huab cua uas ua rau mob COVID-19:

• Qhib cov nqus cua thiab tso cua tawm kom loj thaum kev sib kis kab mob Covid-19 hauv zos nce rau theem siab.
• Tso cov twj lim ntxiv rau cov tshuab nqus cua thiab tso cua tawm raws li OSHA, EPA thiab ASHRAE
• Qhib cov tshuab tso cua thiab nqus cua tawm txhua txhua hnub li ib teev ua ntej sawv dawv tuaj txog rau hauv tsev kawm ntawv thiab ib teev tom qab sawv daws tawm kom tshuab tau tej cua sab haud tawm mus ntxiv.
• Thaum lub caij sov, peb kuj siv cov tshuab no rau yav hmo ntuj los pab ua kom lub tsev txias thiab.
• Nyob rau cov chaw uas hauv paus tsev kawm ntawv qhov khoos kas Indoor AIr Quality program tau ntsuas pom tias qhov CO2 nceb siab lawm mas yuav tau siv ib lub tshuab HEPA los lim kom cov cua huv.

SPPS tau tsim kom muaj tus qauv ntxuav tes handwashing thiab ua pa huv si respiratory etiquette (npog qhov ncauj thaum hnoos thiab txham) rau cov tub ntxhais kawm ntawv thiab xib fwb kom lawv tsis txhob raug kab mob thiab txhob kis rau lwm tus xws li COVID-19. Peb yuav qhia thiab tswj kom muaj kev siv xab npum ntxuav tes ntev li 20 sij feeb thiab/los sis siv cov tshuaj ntxuav tes uas muaj txog 60% cawv.

Minnesota State High School League thiab Minnesota Department of Education cov lus qhia txog kev ua kis las thiab kev ua ub no tseem yuav muaj hloov kho tsis tu ncua. Thov mus saib hauv MSHSL sport guidance and information kom paub cov lus qhia tshiab. Yog xav paub ntxiv, thov mus saib hauv spps.org/sports los sis hu rau nej lub tsev kawm ntawv tus thawj saib xyuas kev ua kis las.