Return to Headlines

Hmoob: Tej Yam Muaj Rau Hauv SPPS Tam Sim No – Lub 1 Hlis Tim 25, 2024

Kev npaj rau thaum muaj tej huab cua tsis zoo nyob rau lub caij ntuj no

Pib lub Ib Hlis xyoo 2024 mus, Xees Phos Tsoom Fwv Tsev Kawm Ntawv yuav pib siv cov kev npaj thaum muaj tej huab cua tsis zoo nyob rau lub caij ntuj no nov: Thawj ob hnub uas huab cua tsis zoo es SPPS txiav txim siab kaw tsev kawm ntawv, ces ob hnub ntawd yuav “tsis muaj kawm ntawv”. Cov tub ntxhais kawm yuav tsum tsis txhob mus kawm ntawv, thiab yuav tsis muaj “e-learning” los sis kawm online. Tom qab ob hnub tsis muaj kawm ntawv vim huab cua phem, ces mam li txiav txim siab seb puas cia muaj e-learning los sis yuav cia tsis muaj kawm ntawv. Qhov nov yog cia rau SPPS txiav txim siab.

Cov tub ntxhais sib cav tswv yim yeej qhov kev sib tw hauv lub xeev

Kiernan Baxter-Kauf thiab Max Ulven uas yog ob tug me nyuam kawm ntawv hauv Central High School tau yeej thib ib rau qhov kev sib tw Minnesota State High School League Debate State Tournament rau fab Public Policy. Peb nrog nkawv zoo siab heev rau qhov kev muaj yeem no!

Qhib saib tsev kawm ntawv & muab lub sij hawm ntxiv rau cov tsev neeg xaiv tsev kawm ntawv

Tseem muaj sij hawm rau nej mus teev npe kawm ntawv hauv SPPS rau xyoo 2024-25. Mus saib hauv spps.org/apply es nrhiav lub tsev kawm ntawv kom haum rau nej tus me nyuam. Tam sim no peb tab tom qhib saib tsev kawm ntawv thiab nws yog ib lub cib fim zoo rau nej mus ncig saib cov tsev kawm ntawv uas nej nyiam. Mus saib kom paub cov hnub thiab sij hawm qhib saib tsev kawm ntawv hauv spps.org/openhouses. Ua ntawv teev npe xa mus tsis pub dhau hnub kawg rau kev teev npe uas yog lub Ob Hlis tim 23 nej thiaj muaj feem zog tau mus kawm rau lub tsev kawm ntawv uas nej xaiv.

Ua kev zoo siab rau hnub taug kev mus kawm ntawv lub caij ntuj no

Tsis txhob cia lub caij ntuj no ua rau koj nyob hauv tsev xwb – cia li nqa koj lub hnab looj tes thiab khau raj tiv no es taug kev mus kawm ntawv rau hnub tim 7 lub Ob Hlis! Thov caw txhua tsev neeg tuaj koom. Taug kev yog ib qho lom zem, txawm yuav nyiam yog lub caij ntuj no los nws yeej pab tau rau txoj kev noj qab nyob zoo. Nco ntsoov nug nej lub tsev kawm ntawv seb lawv yuav ua kev zoo siab rau hnub twg yog tias tsis ua rau hnub hais los no. Xav paub ntxiv, mus saib hauv spps.org/Page/40786.

Bilingual Seals rau cov kawm qib 10-12

Peb xav kom cov tub ntxhais kawm qib 10-12 uas txawj hais ntau tshaj ib hom lus xeem tus Bilingual Seal kom tau txais kev lees paub txog hom lus uas lawv txawj. Qhov kev xeem no muaj xeem ua 30 hom lus. Cov tub ntxhais kawm ntawv uas xeem tau qhab nia zoo tsim nyog mas yuav tau txais txog li ntawm 20 tus qhab nia dawb mus rau tsev kawm ntawv qib siab rau ib hom lus twg! Cov tub ntxhais kawm ntawv muaj peev xwm siv daim ntawv no los sau npe tsis pub dhau lub Ib Hlis tim 31, 2024. Xav paub ntxiv txog Bilingual Seals mus saib hauv spps.org/languages.

Ua kev zoo siab rau hnub National African American Parent Involvement Day 

National African American Parent Involvement Day (NAAPID) yog lub Ob Hlis tim 12. SPPS yuav ua kev zoo siab rau hnub no los ntawm kev muaj cov rooj koom txoos thoob plaws rau hauv cov tsev kawm ntawv thiab yuav xaus los ntawm kev ua koob tsheej thoob plaws hauv koog tsev kawm ntawv thiab lub rooj nthuav qhia txog kev pab hauv Benjamin E. Mays Elementary thaum 5:30 p.m. Mus saib nej lub tsev kawm ntawv qhov website kom paub tias nej lub tsev kawm ntawv yuav ua kev zoo siab rau hnub twg. Yog xav paub ntxiv txog lub rooj nthuav qhia kev pab hauv koog tsev kawm ntawv no, mus saib hauv spps.org/naapid.

Kev pab rau kev siv yeeb siv tshuaj thiab Drug and Chemical Health Resources

SPPS mob siab txog peb cov tub ntxhais kawm ntawv txoj kev noj qab nyob zoo thiab noj qab haus huv. Txij li thaum lub Tsib Hlis 2023, cov chav saib mob hauv txhua lub tsev kawm ntawv puav leej muaj cov tshuaj hu ua naloxone. Naloxone yog ib co tshuaj cawm siav uas muaj peev xwm tig los sis cheem tau cov tshuaj opioid. Ntawm qhov webpage no muaj qhia rau cov tsev neeg txog qhov tias yuav ua li cas yog nej xav tias nej ib tug neeg muaj teeb meem kev siv yeeb siv tshuaj los sis dej caw.

Ceev hnub no tseg: Lub rooj nthuav qhia txog kev npaj ua ntej rau txoj kev kawm qib siab thiab ua hauj lwm

Tuaj koom kom paub ntxiv txog cov cib fim rau nej tus me nyuam lub neej yav tom ntej ntawm lub rooj nthuav qhia txwm xyoo txog kev npaj ua ntej rau txoj kev kawm qib siab thiab ua hauj lwm nyob rau hnub Saturday, lub Ob Hlis tim 17, hauv Harding High School. Nyob rau lub rooj koom txoos tshwj xeeb no, nej yuav muaj lub cib fim ntsib cov neeg sawv cev ntawm cov tsev kawm ntawv qib siab Historically Black Colleges and Universities (HBCU) thiab cov uas kawm tiav, cov neeg ua hauj lwm txais mus kawm qib siab, thiab cov tswv hauj lwm hauv zos. Cov tub ntxhais kawm ntawv uas mus koom lub koom txoos no yuav muaj lub cib fim sau npe mus ncig saib cov tsev kawm ntawv qib siab Historically Black Colleges and Universities (HBCU) thaum lub caij nplooj zeeg fall HBCU college tour.

Nco ntsoov cov hnub no tseg

  • 1 Hlis tim 25: Lub Quarter 2 xaus
  • 1 Hlis tim 26: Tsis muaj kawm ntawv – Cov xib fwb muaj kev kawm thiab muab qhab nia
  • 2 Hlis tim 1-29: Black History Month
  • 2 Hlis tim 12: National African American Parent Involvement Day (NAAPID)
  • 2 Hlis tim 12: Tsis muaj kawm ntawv - Crossroads Elementary nkaus xwb