Hmoob: Tej Yam Muaj Rau Hauv SPPS Tam Sim No – Lub 12 Hlis Tim 21, 2023

Qhia txog kev npaj nyiaj rau xyoo 2025

Ua tsaug rau tshaj li 10,000 tsev neeg, tub ntxhais kawm ntawv, cov neeg ua hauj lwm thiab cov neeg hauv zej zos uas tau qhia tej yam uas nej pom tias muaj nqis rau peb hauv cov rooj sib tham, kev soj ntsuam thiab daim ntawv pab tswv yim txog kev npaj nyiaj rau xyoo 2025. Lub hli tas los, peb twb muab tej uas sawv daws pom tias muaj nqis qhia rau nej tas lawm summary of this engagement . Lub hlis no peb pom tias muaj peb qhov kev muaj nqis uas yuav pab cov thawj coj rau txoj kev txiav txim siab txog nyiaj txiag rau xyoo 2025. Peb kuj tsim tau ib daim ntawv teev cov lus teb rau cov lus uas sawv daws pheej nquag nug txog kev npaj nyiaj thiab. Yog xav paub ntxiv txog kev npaj nyiaj, lus teb rau cov lus nug thiab kev pab tswv yim, mus saib hauv spps.org/fy25budget.

Sau npe kawm ntawv hauv SPPS rau xyoo 2024-25!

Txog caij xaiv ib lub tsev kawm ntawv zoo heev rau xyoo 2024-25 lawm! Tam sim no peb muaj daim ntawv teev npe kawm ntawv rau xyoo 2024-25 lawm. Yog xav kom muaj feem zog tau mus kawm rau thawj lub tsev kawm ntawv uas nej xaiv, cov tsev neeg yuav tsum ua ntawv teev npe xa mus ua ntej lub Ob Hlis tim 9, 2024. Cov tsev kawm ntawv yuav muaj qhib tsev kawm ntawv rau cov tsev neeg mus ncig saib thoob plaws rau lub Ib Hlis thiab thaum lub Ob Hlis xiab; mus saib seb muaj qhib saib tsev kawm ntawv thaum twg nyob rau spps.org/openhouses. Mus saib hauv apply.spps.org kom paub txog peb cov tsev kawm ntawv uas zoo heev thiab kev teev npe online.

Ob lub tsev kawm ntawv theem siab yuav pib qhov khoos kas 3DE rau lwm xyoo

Pib lub caij nplooj zeeg tom ntej no, tag nrho cov tub ntxhais kawm qib cuaj hauv Como Park Senior thiab Washington Technology Magnet yuav kawm ib qho khoos kas tshiab hu ua 3DE los ntawm Junior Achievement North. Qhov khoos kas no yuav coj cov kws txawj tuaj qhia rau hauv chav. Yog xav paub ntxiv txog qhov khoos kas tshiab no, mus saib ntawm spps.org/3DE.

Superintendent lub rooj sib tham online uas muab kaw tseg

Thaum lub 12 Hlis tim 4, Superintendent Gothard muaj ib lub rooj sib tham online uas nws qhia txog SPPS kev npaj nyiaj, tub ntxhais kev tuaj teev npe kawm, SPPS Achieves Strategic Plan, thiab peb hnov dab tsi los ntawm sawv daws nyob rau cov rooj sib tham dhau los thiab cov kev soj ntsuam. Yog tias nej mus koom tsis tau lub rooj sib tham ntawd, nej mus saib tau daim video thiab tej ntaub ntawv txog kev sib tham nyob rau ntawm spps.org/suptmeeting.

Kev pab zaub mov rau thaum mus so rau lub caij ntuj no

SPPS Nutrition Services yuav tsis muaj kev pab zaub mov rau thaum mus so rau lub caij ntuj no. Ramsey County thiaj muaj daim qauv qhia tias yuav mus nrhiav qhov twg thiaj tau zaub mov noj dawb, cov chaw pub khoom noj thiab cov khw muag khoom noj pheej yig thoob plaws hauv St. Paul. Thov tiv tauj cov chaw ntawv kom paub ntxiv.

Kev ua ub no dawb thaum mus so rau lub caij ntuj no rau cov tub ntxhais kawm ntawv

Cov tsev qiv ntawv hauv Xees Phos muaj cov khoos kas uas nqis tes kawm dawb rau cov me nyuam yaus thiab cov hluas thaum mus so rau lub caij ntuj no. Lub tsev qiv ntawv no muaj kev koom tes nrog Badwolf Adventure Studio, Children’s Theatre Company thiab The Loft Literary Center, nrog rau lwm qhov chaw, los muab cov kev kawm puv ntoob xws li siv tsos dej kos thiab pleev duab, pleev kob ua yeeb yam thiab tsim ub no, Dungeons & Dragons, kawm sau zaj lus rau kev teev npe kawm qib siab thiab ntau yam ntxiv. Mus saib hauv sppl.org/winter-break kom paub ntxiv.

Koom kev lom zem nrog cov kev kawm hauv zej zos

Muaj qhib teev npe kawm cov khoos kas hauv zej zos lawm! Peb muaj xyaum ua luam dej, ua noj, tsim duab thiab tej khoom xuas tes ua thiab dhia ua si. Cov kev kawm hauv zej zos no kuj yog ib qho khoom plig zoo los sis ib txoj hau kev zoo los ua kev zoo siab rau lub caij ntuj no hauv Minnesota. Mus saib phau ntawv teev cov kev kawm ntawm no spps.org/Page/44006.

Nco ntsoov cov hnub no

Lub 12 Hlis tim 25 txog 1 Hlis tim 3: Crossroads Montessori so rau lub caij ntuj no
Lub 12 Hlis tim 25 txog 1 Hlis tim 5: Txhua lub tsev kawm ntawv so rau lub caij ntuj no tshwj Crossroads Montessori