Karen: လါဒံၣ်စဲဘၢၣ် ၂၁သီ, ၂၀၂၃ နံၣ်

တလါတဘျီ ၂၀၂၅နံၣ်ကၠိစ့တိာ်ပာ်အတၢ်ဂ့ၢ်တၢ်ကျိၤ

စံးဘျုးဘၣ် ဟံၣ်ဖိဃီဖိတဖၣ်, ကၠိဖိတဖၣ်, ကၠိပှၤမၤတၢ်ဖိတဖၣ် ဒီး ပှၤတဝၢဖိတဖၣ် လၢအါန့ၢ် ၁၀,၀၀၀ ဂၤ လၢအဟ့ၣ်နီၤဟ့ၣ်ခီ အတၢ်ပာ်လုၢ်ပာ်ပှ့ၤတဖၣ်ဃုာ်ဒီးပှၤလၢပပှၤတဝၢတၢ်နုာ်လီၤမၤသကိးတၢ်အတၢ်အိၣ်ဖှိၣ် အကတီၢ်တဖၣ်အပူၤ, တၢ်ဃုထံၣ်သ့ၣ်ညါပှၤတဝၢအတၢ်ထံၣ်တၢ်ပာ်သးတဖၣ် ဒီး တၢ်ဟ့ၣ်ကူၣ်ဟ့ၣ်ဖး လၢ ၂၀၂၅နံၣ် စ့တိာ်ပာ်အဂီၢ်လံာ်တကွီၢ်ဒိတဖၣ်န့ၣ်လီၤ. အပူၤကွံာ်တလါ, ပဟ့ၣ်နီၤဟ့ၣ်ခီ ပှၤတဝၢတၢ်နုာ်လီၤမၤ သကိးတၢ် အတၢ်ဂ့ၢ်ကျၢၢ်တံၢ် ဃုာ်ဒီးနၤန့ၣ်လီၤ. တလါညါအံၤ, ပသ့ၣ်ညါဒီးပာ်ပနီၣ် တၢ်မၤအကါဒိၣ်သၢခါ လၢတၢ်ကြၢးမၤဆိအီၤလၢ အကမၤစၢၤပှၤလၢတၢ်ပာ်လီၤတၢ်ဆၢတဲာ်လၢ ၂၀၂၅နံၣ်ကၠိစ့တိာ်ပာ်အဂီၢ်န့ၣ်လီၤ. ပဒုးအိၣ်ထီၣ်စ့ၢ်ကီး စရီလီၤတံၢ်လီၤဆဲးလၢပှဲၤတဘ့ၣ်လၢအမ့ၢ် တၢ်သံကွၢ်လၢပှၤညီနုၢ်သံကွၢ်ဝဲတဖၣ်လၢအ ဘၣ်ဃးဒီးကၠိစ့တိာ်ပာ်န့ၣ်လီၤ. ဝံသးစူၤနုာ်လီၤ ကွၢ် spps.org/fy25budget ပှၤယဲၤလၢနကအိးထီၣ်ကွၢ် ကၠိစ့ တိာ်ပာ်အကါဒိၣ်လၢတၢ်ကြၢးမၤဆိအီၤတဖၣ်, FAQ  (တၢ်သံကွၢ်လၢပှၤညီနုၢ်သံကွၢ်တဖၣ်) ဒီး ဟ့ၣ်နီၤဟ့ၣ်ခီ နတၢ်ဟ့ၣ်ကူၣ်ဟ့ၣ်ဖးတဖၣ်အဂီၢ်န့ၣ်တက့ၢ်.

ပတံထီၣ်ကၠိလၢ ကၠိနံၣ် ၂၀၂၄-၂၀၂၅ အဂီၢ် ဖဲ စ့ၣ်ဖီလ်ပဒိၣ်ကၠိ

တၢ်ဆၢကတီၢ်ဘၣ်လၢနကဃုထၢကၠိအဂ့ၤကတၢၢ်တဖျၢၣ်လၢ ၂၀၂၄-၂၀၂၅နံၣ်အဂီၢ်လီၤ. လံာ်တကွီၢ်ဒိ ပတံထီၣ်ကၠိလၢ ကၠိနံၣ် ၂၀၂၄-၂၀၂၅ အဂီၢ် အခဲအံၤနမၤန့ၢ်အီၤသ့လံ. လၢနကဒိးန့ၢ်တၢ်ခွဲးတၢ်ယာ်အဂ့ၤ ကတၢၢ်လၢနကမၤန့ၢ်ကၠိလၢ နဃုထၢနီၣ်ဂံၢ်တၢအဂီၢ်န့ၣ်, ဟံၣ်ဖိဃီဖိကြၢးပတံထီၣ်ကၠိတချုးတလၢထီၣ်ဒံးဖဲ လါဖ့ၣ်ဘြူၤအါရံၤ ၉သီ, ၂၀၂၄နံၣ် အနံၤန့ၣ်လီၤ. ကၠိတဖၣ်ကရဲၣ်ကျဲၤမၤဝဲ တၢ်အိးထီၣ်ကၠိအနံၤတဖၣ်ဖဲ လါယနူၤအါရံၤဒီတလါညါအပူၤ ဒီးတုၤလၢ လါဖ့ၣ်ဘြူၤအါရံၤအခီၣ်ထံးတနွံ, ဒီး ကွၢ်ဃု တၢ်အိးထီၣ်ကၠိ အမူးမုၢ်နံၤမုၢ်သီဖဲ spps.org/openhouses ပှာ်ယဲၤ ဖီခိၣ်အံၤန့ၣ်တက့ၢ်. နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ် တၢ်ကျိၤဘၣ်ဃးဒီး ပကၠိအဂ့ၤကတၢၢ်တဖၣ် ဒီး အီန်လဲ လံာ်တကွီၢ်ဒိန့ၣ် နုာ်လီၤကွၢ် apply.spps.org ပှၤယဲၤန့ၣ်တက့ၢ်.

3DE တၢ်ရဲၣ်တၢ်ကျဲၤ စးထီၣ်သးဖဲ တီၤထီကၠိခံဖျၢၣ်အပူၤလၢကၠိနံၣ်လၢခံတနံၣ်အပူၤ

စးထီၣ်လၢခံတနံၣ်သ့ၣ်လၣ်လီၤကတီၢ်န့ၣ်, ခွံတီၤကၠိဖိကိးဂၤဒဲးဖဲ Como Park တီၤထီကၠိ ဒီး Washington Technology Magnet တီၤထီကၠိ ကဘၣ်မၤလိ တၢ်မၤဂ့ၤမၤသီထီၣ်တၢ်အတၢ်ရဲၣ်တၢ်ကျဲၤလၢဘၣ်တၢ်ကိး အီၤလၢ 3DE လၢ Junior Achievement North န့ၣ်လီၤ. တၢ်ရဲၣ်တၢ်ကျဲၤကဟဲစိာ်နုာ် ပှၤစဲၣ်နီၤတဖၣ်ဆူတီၤ ဒၢးတဖၣ် အပူၤ လၢ တၢ်ဖံးလိမၤဒိးဖရီကၠဲၤတဖၣ် ဒီး တၢ်မၤလိဃုသ့ၣ်ညါတၢ်ဂ့ၢ်နီၢ်နီၢ်တဖၣ်အဂီၢ်န့ၣ်လီၤ. ဃုသ့ၣ်ညါ အါထီၣ်တၢ်ဂ့ၢ်တၢ်ကျိၤဘၣ်ဃး တၢ်ရဲၣ်တၢ်ကျဲၤအသီဝဲအံၤဖဲ  spps.org/3DE ပှာ်ယဲၤအဖီခိၣ်န့ၣ် တက့ၢ်.

ကၠိပှၤပၢဆှၢတၢ်ခိၣ်ကျၢၢ်(Superintendent) အီန်လဲတၢ်အိၣ်ဖှိၣ်တၢ်ဂီၤမူ

ဖဲ လါဒံၣ်စဲဘၢၣ် ၄သီအနံၤန့ၣ်, Superintendent Gothard ရဲၣ်ကျဲၤကိးဝဲ အီန်လဲတၢ်အိၣ်ဖှိၣ်လၢ အဝဲတဲဒုး သ့ၣ်ညါတၢ်ဂ့ၢ်တၢ်ကျိၤဘၣ်ဃး စ့ၣ်ဖီလ်ပဒိၣ်ကၠိ ကၠိစ့တိာ်ပာ်, ကၠိဖိတၢ်ဆဲးလီၤမံၤအနီၣ်ဂံၢ်တၢ်အိၣ်သးတဖၣ်, SPPS Achieves Strategic Plan, ဒီး တၢ်သ့ၣ်တဖၣ်လၢပနၢ်ဟူတ့ၢ်လၢ ပပှၤတဝၢ တၢ်နုာ်လီၤမၤသကိးတၢ် အတၢ်အိၣ်ဖှိၣ်တဖၣ်အပူၤ ဒီး တၢ်ဃုသ့ၣ်ညါပှၤတဝၢအတၢ်ထံၣ်တၢ်ပာ်သးတဖၣ်န့ၣ်လီၤ. နမ့ၢ်တဟဲထီၣ်ဘၣ် တၢ်အိၣ်ဖှိၣ်အဘျီဝဲအံၤဘၣ်န့ၣ်, နကွၢ်ဃု တၢ်အိၣ်ဖှိၣ်အတၢ်ဂီၤမူ ဒီး တၢ်အိၣ်ဖှိၣ်လံာ်လဲၢ်ပီးလီတဖၣ်သ့ဖဲ spps.org/suptmeeting ပှာ်ယဲၤအဖီခိၣ်အံၤန့ၣ်လီၤ.

တၢ်အီၣ်တၢ်အီအတၢ်တိစၢၤမၤစၢၤဖဲ တၢ်ဂိၢ်ခါကၠိပျၢ်ကသုၣ်အကတီၢ်

စ့ၣ်ဖီလ်ပဒိၣ်ကၠိတၢ်အီၣ်တၢ်အီဝဲၤကျိၤ (SPPS Nutrition Services) တသုးကျဲၤဟ့ၣ်လီၤတၢ်အီၣ်တၢ်အီဖဲ တၢ်ဂိၢ်ခါ ကၠိပျၢ်ကသုၣ်အကတီၢ်န့ၣ်ဘၣ်. Ramsey County (ရၣ်မစံၣ်ခီၣ်ထံၣ်) ပာ်ဖှိၣ်ဒုးအိၣ်ထီၣ်ဝဲတၢ်နဲၣ် ကျဲအဝဲအံၤလၢ နကဒိးန့ၢ်ကလီတၢ်အီၣ်တဖၣ်, တၢ်နီၤလီၤတၢ်အီၣ်တၢ်အီအလီၢ်အကျဲတဖၣ် ဒီး တၢ်ဆါတၢ် အီၣ်တၢ်အီအပှ့ၤဘၣ် တၢ်လီၢ်တၢ်ကျဲတဖၣ်ဖဲ စ့ၣ်ဖီလ်အပူၤန့ၣ်လီၤ. နမ့ၢ်အဲၣ်ဒိးသ့ၣ်ညါတၢ်ဂ့ၢ်လီၤတံၢ်လီၤဆဲး န့ၣ် ဝံသးစူၤဆဲးကျိးတၢ်လီၢ်လၢ အဟ့ၣ်လီၤတၢ်အီၣ်တၢ်အီတဖၣ်န့ၣ်တက့ၢ်.

တၢ်ဂိၢ်ခါတၢ်ဟူးတၢ်ဂဲၤကလီတဖၣ်လၢကၠိဖိတဖၣ်အဂီၢ်

စ့ၣ်ဖီလ်ပဒိၣ်ကၠိ လံာ်ရိဒၢး ဟ့ၣ်လီၤကလီ, တၢ်ရဲၣ်တၢ်ကျဲၤတၢ်ဟူးတၢ်ဂဲၤတဖၣ်လၢ ပှၤဖိသၣ်ဆံးတဖၣ် ဒီး ပှၤလိၣ်ဘိတဖၣ်အဂီၢ်ဖဲ တၢ်ဂိၢ်ခါကၠိပျၢ်ကသုၣ်အကတီၢ်န့ၣ်လီၤ. လံာ်ရိဒၢးဖီၣ်လိာ်စုမၤသကိးတၢ်ဒီး Badwolf Adventure Studio, Children’s Theatre Company ဒီး The Loft Literary Center, ပှၤဂုၤဂၤ, လၢအသုး ကျဲၤဟ့ၣ်လီၤတၢ်ရဲၣ်တၢ်ကျဲၤတၢ်ဟူးတၢ်ဂဲၤတဖၣ်ဒ်အမ့ၢ်ဝဲ တၢ်တ့တၢ်ဂီၤလၢထံ, တၢ်တ့ထီၣ်သးလၢတၢ်ဒုးနဲၣ် ပာ်ဖျါထီၣ်သးအဂီၢ် ဒီး တၢ်တ့ထီၣ်တၢ်အက့ၢ်အဂီၤ, Dungeons & Dragons, တၢ်ကွဲးခီလ့ၣ်ကၠိလံာ်ဆီရဲၣ် တၢ်မၤလိတဖၣ် ဒီး တၢ်အဂုၤဂၤတဖၣ်န့ၣ်လီၤ. နုာ်လီၤကွၢ် sppl.org/winter-break ပှာ်ယဲၤလၢနကသ့ၣ်ညါ အါထီၣ်တၢ်ဂ့ၢ်တၢ်ကျိၤအဂီၢ်န့ၣ်တက့ၢ်.

ဟဲသးဖှံဃုာ်ဒီး မၤလိတၢ်ဖဲ ပှၤတဝၢတၢ်ကူၣ်ဘၣ်ကူၣ်သ့ (Community Education)

စးထီၣ်လၢတၢ်ပှီၢ်ထံ ဒီးတုၤဆူ တၢ်ဖီအီၣ်တၢ် ဒီးဆူ ဒွဲလၤကူၣ်သ့ ဒီး တၢ်စုသ့ခီၣ်ဘၣ်တဖၣ်ဆူ နီၢ်ခိတၢ်ဟူး တၢ်ဂဲၤ, ပကွဲမုာ်နၤလၢနကဆဲးလီၤမံၤလၢ တၢ်ဂိၢ်ခါတီၤတၢ်ဖံးလိမၤဒိးတဖၣ်အဂီၢ်ဖဲ စ့ၣ်ဖီလ် ပှၤတဝၢတၢ်ကူၣ် ဘၣ်ကူၣ်သ့ လၢအအိးထီၣ်သးခဲအံၤန့ၣ်တက့ၢ်. ပှၤတဝၢတၢ်ကူၣ်ဘၣ်ကူၣ်သ့တီၤ ကမ့ၢ်ဝဲတၢ်ဟ့ၣ်အဒိၣ်က တၢၢ်တခါ ဒီး ကျဲအဂ့ၤကတၢၢ်တဘိ လၢနကသူၣ်ဖှံသးညီမၤလၤကပီၤ တၢ်ဂိၢ်ခါအလါတဖၣ်ဖဲ မံၣ်နံၣ်စိထၣ် အပူၤန့ၣ်လီၤ. ကွၢ်လံာ်တၢ်ဖံးလိမၤဒိးအတၢ်ရဲၣ်လီၤကျဲၤလီၤအစရီဖဲအံၤလၢ- spps.org/Page/44006 ပှာ်ယဲၤ အဖီခိၣ်န့ၣ်တက့ၢ်.

လံာ်နံၣ်လံာ်လါ တၢ်ဒုးသ့ၣ်နီၣ်တဖၣ်

• ဒံၣ်စဲဘၢၣ် ၂၅သီ - ယနူၤအါရံၤ ၃သီ -  တၢ်ဂိၢ်ခါကၠိပျၢ်ကသုၣ်လၢ Crossroads Montessori ကၠိအဂီၢ်

• ဒံၣ်စဲဘၢၣ် ၂၅သီ - ယနူၤအါရံၤ ၅သီ - တၢ်ဂိၢ်ခါကၠိပျၢ်ကသုၣ်လၢ ကၠိကိးဖျၢၣ်အဂီၢ်လၢအတပၣ်ဃုာ် Crossroads Montessori  ကၠိဘၣ်.